மொட்டைக் கனவுகள் பூக்கும்
அற்புதத் தீவுக்கு
புதையல் எடுக்கப் புறப்பட்டு வந்தான்
நீண்ட கனவுகளின்
சொந்தக்காரன் ஒருவன்.

நான்குபுறமும் 'கடனால்' சூழப்பட்ட
அத்தீவின்
வீதியோராத்து விளம்பரப் பலகைகளின்
நிர்வாணப் பெண்களோடு
எலும்புகளை உரசி
காமத்தீ மூட்டி குளிர்காய்ந்தான்.

அவன் தனது ஆயுள் ரேகைகளை
ஆளும் வர்க்கத்திடம் பறி கொடுத்தான்.

அவனது முற்றத்தில் பல
புது விளக்குமாறுகள்
கூட்டிக்கொண்டிருந்தன
பின்னாளில் அவைகளே பழசாகி
குப்பைகள் ஆகின.

அவன் புதையல் எடுக்கத் தோண்டுகையில்
பல மனித எச்சங்களைக் கண்டான்.
தோண்டித் தோண்டி
அவனே புதைந்து போகிறான்.