நகரும் வினாடிக்குள்
தொலையும் காலத்தைக்
கணக்கெடுப்பதில்
ஆயுள் கரைகிறது …

முற்றுப் புள்ளியிலிருந்து
ஆரம்பிக்கும்
புது வரிகளைப் போல்
மயானத்திலிருந்து தொடங்குகிறது வாழ்வு …

கரைகளில் மோதும்
அலைகளின் இரைச்சல்
ஆழத்தின் அமைதியை
குலைப்பது போல்

ஆன்ம இசையின்
அழிவில்லா நாதத்தை
மறுக்கும் செவிகளுக்கு
புறங்களின் இரைச்சல்
அற்புதமானதுதான் …

கால்களை இறுகப்பற்றாத
மயானத்து மண்ணில்
எங்களின் உறக்கம்
நிச்சயம் என்பதை
நம்ப மறுக்கும் போதும்

உயர்ந்த மண் குவியல்களைக் கொண்டு
மரண விகிதாசாரம்
கணக்கிடப் படும் போதும்

சிதையில் உடல்களின்
நெஞ்சுக் கூடு
உயரும் போதும்
அற்புதமான இசையை
ஆன்மா
மீட்டிக்கொண்டிருக்கும் …

03ஃ03ஃ2006