முட்கள் எப்போது தோன்றின?
முதலில் தோன்றியவை முட்கள்தானா?

இல்லையென்றுதான் எனக்குத் தோன்றுகின்றது.

ஏதோ ஒன்றைப் பாதுகாக்க வேண்டியே
முட்கள் முதலில் தோன்றியிருக்க வேண்டும்.

தன்னைப் பாதுகாக்க இயலாத
உயிர்க் கலம் ஒன்று
தான் தாக்கப்படுகையில்
ஏதோவோர் வகையில் எதிர்க்கவே செய்யும்.
இறக்குமட்டிலும் இந்த எதிர்ப்பு
இருக்கவே செய்யும்.

இந்த எதிர் முனைப்பு
இறந்த பின்னரும்
இறவாமலேயிருந்து மறுபடி பிறக்கையில்
கூடவே பிறக்கின்றதா?

பிறப்பெடுத்த உடலுக்குள்
அதுவோர் முனைப்பாய், மொக்காய்
உருவெடுக்கின்றதா?

ஆயிரம் ஆண்டுகளின் பின்னர்
ஒரு புழுவுக்கு கொம்பு முளைக்கும்
இயற்கையின் அதிசயம் இதுவா?

கொம்பாய், பல்லாய்
முள்ளாய், விஷமாய்
இங்கு இருப்பவை யாவும்
தற்பாதுகாப்புக்கான கருவிகள்தானா?

இந்த ஆக்கம் பற்றிய உங்கள் கருத்துக்கள்(0 posts)